Met ’n tema van ” ’n Fees van Liefde” bied die Suidoosterfees in 2012 gepaste produksies waarin liefde die botoon vier. Liefde vir die kunste, familieliefde, ’n liefde vir kos, ’n liefde vir die lewe, noem maar op.
Die liefde van ’n ma vir haar seun is die hart van die hartroerende My Naam/Name is Ellen Pakkies. Dié gewilde toneelstuk, met die bekende aktrise Lizz Meiring as regisseur, is geskoei op die ware verhaal van Pakkies, ’n ma wie se liefde vir haar tikverslaafde seun haar tot die uiterste gedryf het: Moord.
Vinette Ebrahim, wat die rol van die geliefde koffiewinkeleienaar Charmaine in 7de Laan vertolk, is Pakkies en 7de Laan se ”Errol”, Christo Davids, haar seun, Abie.
Ebrahim, ’n Suidoosterfees-skouerklopwenner, was al verskeie keer op die Suidoosterfees te sien in onder meer Vaselinetjie, Miss Africa South, Poppie en Boesman en Lena. Davids was voorheen op die fees in Krismis van Map Jacobs.
My Naam/Name is Ellen Pakkies word twee keer tydens die Suidoosterfees opgevoer op 18 en 19 Februarie, telkens om 13:00. Besprekings reeds vanaf 16 September. Kaartjies by Computicket te koop.
* Die Suidoosterfees vind vanaf 14 tot 19 Februarie by Artscape plaas. Bel 021 446 1558 of stuur e-pos na suidooster@media24.com.
No comments:
Post a Comment